Jos 18 | NdeIBE | STEP | Ibandla lonke lako-Israyeli labuthana eShilo laselimisa ithente lokuhlanganela khonapho. Ilizwe lalethwa ngaphansi kombuso wabo,

Joshua 18

Ukwabiwa kwelizwe elalisele.

1 Ibandla lonke lako-Israyeli labuthana eShilo laselimisa ithente lokuhlanganela khonapho. Ilizwe lalethwa ngaphansi kombuso wabo, 2 kodwa kwakulokhu kulezizwana zako-Israyeli eziyisikhombisa ezazingakemukeli ilifa lazo.

3 Ngakho uJoshuwa wathi kwabakako-Israyeli, “Lizakuma okwesikhathi esinganani lingakathathi umhlaba lowo uJehova, uNkulunkulu waboyihlo alinike wona?

4 Khethani amadoda amathathu esizweni sinye ngasinye. Ngizawathuma ukuthi ayehlola ilizwe abeseloba ngesimo salo, kusiya ngelifa lesizwana ngasinye. Azaphindela kimi.

5 Lizakwaba umhlaba ube yizigaba eziyisikhombisa. UJuda uzaqhubeka eselizweni lakhe eningizimu njalo indlu kaJosefa iselizweni layo enyakatho. 6 Ngemva kokuba selibhale ingcazelo yezigaba eziyisikhombisa zelizwe, ziletheni kimi lapha njalo ngizalenzela inkatho phambi kukaJehova uNkulunkulu wethu.

7 AbaLevi, lanxa kunjalo, kabazuzi lutho phakathi kwenu, ngoba umsebenzi wobuphristi kuJehova yilifa labo. Njalo uGadi, uRubheni lengxenye yesizwe sikaManase sebathola ilifa labo eceleni langempumalanga yeJodani. UMosi inceku kaJehova wabanika lona.”

8 Kwathi amadoda engena indlela esiyahlola umhlaba, uJoshuwa wawalaya esithi, “Hambani liyehlola umhlaba beselibhala ingcazelo yesimo sawo. Libe selibuya kimi, njalo ngizalenzela inkatho lapha eShilo phambi kukaJehova.”

9 Ngakho amadoda asuka adabula phakathi kwelizwe. Abhala ingcazelo yesimo salo ephepheni eligoqwayo, idolobho ngedolobho, ezigabeni eziyisikhombisa, asephindela kuJoshuwa esihonqweni seShilo.

10 UJoshuwa wawenzela inkatho eShilo phambi kukaJehova, njalo lapho wabela ilizwe kwabako-Israyeli kusiya ngokwehlukaniswa kwezizwana.

Isabelo sikaBhenjamini

11 Inkatho yawela isizwana sakoBhenjamini usendo lunye ngalunye. Ilizwe labo elabiwayo laliphakathi kwezizwana zakoJuda loJosefa:

12 Eceleni lenyakatho umngcele wabo wawuqalisela kuJodani, usedlula emthezukweni wangenyakatho yeJerikho usiya entshonalanga elizweni elilamaqaqa, uthutshela enkangala yeBhethi Aveni. 13 Usuka lapho wawuchaphela emthezukweni weningizimu oweLuzi (okutsho iBhetheli) usehlela phansi e-Atherothi Adari eqaqeni oluseningizimu yeBethi Horoni engaphansi.

14 Usuka eqaqeni olukhangelane leBhethi Horoni eningizimu ulandela icele lentshonalanga wasuthutshela eKhiriyathi Bhali (okutsho iKiriyathi Jeyarimi) idolobho labantu bakoJuda. Leli kwakulicele langentshonalanga.

15 Icele langeningizimu laliqalisela emaphethelweni eKhiriyathi Jeyarimi entshonalanga, njalo umngcele waphuma emthonjeni wamanzi oweNefuthowa.

16 Umngcele wehla waya ewatheni lentaba ekhangelane leSigodi seBheni Hinomi, enyakatho yeSigodi seRafayimi. Waqhubeka usehla eSigodini seHinomi ulandela umthezuko wedolobho lamaJebusi usiya e-Eni Rogeli.

17 Wasubhoda usiya enyakatho, waya e-Eni Shemeshi, waqhubeka usiya eGelilothi, ekhangele uMkhandlu we-Adumimi, wehla phansi usiya elitsheni likaBhohani indodana kaRubheni. 18 Waqhubeka emthezukweni wenyakatho oweBhethi Arabha wehlela phansi ungena e-Arabha.

19 Wasusiya emthezukweni wasenyakatho oweBhethi Hogila wasuphumela ewatheni langenyakatho loLwandle lweTshwayi lapho okuthela khona iJodani eningizimu. Lo kwakungumngcele waseningizimu.

20 IJodani yenza umngcele eceleni langempumalanga. Le kwakuyimingcele eyayiphawula ilifa lezinsendo zikaBhenjamini emaceleni wonke.

21 Isizwana sikaBhenjamini, usendo ngosendo sasilamadolobho alandelayo: IJerikho, iBhethi Hogila, i-Emeki Khezizi,

22 iBhethi Arabha, iZemarayima, iBhetheli,

23 i-Avimu, iPhara, i-Ofira, 24 iKhefari Amoni, i-Ofini leGebha – amadolobho alitshumi lambili kanye lemizana yawo.

25 IGibheyoni, iRama, iBheherothi,

26 iMizipha, iKhefira, iMoza,

27 iRekhemi, iRipheyeli, iTharala, 28 iZela, iHayelefi, idolobho lamaJebusi (okuyikuthi iJerusalema), iGibheya leKhiriyathi – amadolobho alitshumi lane kanye lemizana yawo. Leli kwakuyilifa likaBhenjamini lezinsendo zakhe.